Парадак і ўмовы афармлення ДТЗ без удзелу супрацоўнікаў ДАІ

1 верасня 2019 г. набыў моц Указ Прэзідэнта Рэспублікі Беларусь ад 11 мая 2019 г. № 175 «Аб страхаванні», у адпаведнасці з якім павялічаны ліміт страхавой кампенсацыі пры афармленні ДТЗ без выкліку ДАІ з 400 да 800 еўра.

Перавагамі афармлення ДТЗ шляхам запаўнення Апавяшчэння з'яўляюцца шпаркасць і зручнасць, бо вадзіцелям не трэба чакаць прыезду супрацоўнікаў ДАІ. Пры гэтым страхоўшчык выплачвае пацярпеламу страхавую кампенсацыю на падставе Апавяшчэння, а вінаваты не прыцягваецца да адміністрацыйнай адказнасці.

Часта вадзіцелі, знаходзячыся ў стрэсавай сітуацыі, маюць цяжкасці пры прыняцці рашэння аб афармленні ДТЗ без выкліку ДАІ і запаўненні Апавяшчэння.

Беларускім бюро па транспартным страхаванні сумесна са страхавымі арганізацыямі — членамі Беларускага бюро створаны кол-цэнтр па кароткім нумары 140 для кансультавання грамадзян па пытаннях, звязаных з афармленнем ДТЗ без выкліку ДАІ (далей — кол-цэнтр 140).

Звярнуўшыся ў кол-цэнтр 140, грамадзяне змогуць аператыўна атрымаць кансультацыю як па парадку і ўмовах афармлення ДТЗ без выкліку ДАІ, так і па запаўненні Апавяшчэння, а таксама па іншых пытаннях, на якія неабходна звярнуць асаблівую ўвагу ў такіх сітуацыях.

Аператары кол-цэнтра 140 пры неабходнасці змогуць праверыць у базе даных па абавязковым страхаванні грамадзянскай адказнасці ўладальнікаў транспартных сродкаў наяўнасць дзеючых дагавораў страхавання адносна транспартных сродкаў, якія ўдзельнічалі ў ДТЗ.

Кансультацыі аператарамі кол-цэнтра 140 прадастаўляюцца бясплатна. Пры гэтым кошт паслуг мабільнай сувязі — па тарыфах мабільных аператараў (СТАА «Мабільныя ТэлеСістэмы», УП «А1», ЗАТ «БеСТ»), званкі для абанентаў стацыянарнай тэлефоннай сеткі (РУП «Белтэлекам») з'яўляюцца бясплатнымі.