Абавязковае медыцынскае страхаванне замежных грамадзян і асоб без грамадзянства, якія часова знаходзяцца або часова пражываюць у Рэспубліцы Беларусь

Пры адсутнасці ў замежных грамадзян страхавых полісаў (страхавых картак), якія адпавядаюць абазначаным патрабаванням і іх адмове заключыць дагавор абавязковага медыцынскага страхавання ў пункце пропуску праз Дзяржаўную граніцу Рэспублікі Беларусь, размешчаным у міжнародных аэрапортах, гэтым замежным грамадзянам адмаўляецца ва ўездзе ў Рэспубліку Беларусь у парадку, вызначаным заканадаўчымі актамі.

Згодна з заканадаўствам Рэспублікі Беларусь замежныя грамадзяне, якія часова знаходзяцца або часова пражываюць у Рэспубліцы Беларусь, абавязаны мець дагавор абавязковага медыцынскага страхавання або дагавор медыцынскага страхавання, заключаны з замежнай страхавой арганізацыяй на выпадак аказання ім медыцынскімі ўстановамі хуткай і неадкладнай медыцынскай дапамогі.

Дагавор абавязковага медыцынскага страхавання Белдзяржстраху можа быць набыты замежным грамадзянінам у пунктах пропуску праз Дзяржаўную граніцу Рэспублікі Беларусь (у міжнародных аэрапортах, пагранічных пунктах) пасля прыбыцця ў Рэспубліку Беларусь.

Таксама заключыць дагавор абавязковага медыцынскага страхавання Белдзяржстраху на карысць замежнага грамадзяніна маюць права асобы, якія запрашаюць замежнага грамадзяніна ў Рэспубліку Беларусь (юрыдычныя асобы Рэспублікі Беларусь, грамадзяне Рэспублікі Беларусь, замежныя грамадзяне, якія законна знаходзяцца ў Рэспубліцы Беларусь).

Для заключэння дагавора абавязковага медыцынскага страхавання страхавальніку неабходна звярнуцца да страхоўшчыка з вуснай заявай і паведаміць прозвішча, уласнае імя, імя па бацьку (пры яго наяўнасці) асобы, на карысць якой заключаецца гэты дагавор, яго пастаяннае месца жыхарства, грамадзянства, перыяд знаходжання ў Рэспубліцы Беларусь.